كيف أخدت الرخصة البريطانية

التدوينة دي الـمرة غير

مواكبة لأخبار وحديث السّاعة، فكّرت أتكلم عن تجربتي في تعلم السّواقة في بريطانيا

ماما كانت من أكبر الـمُشجّعين ليّا في إنّي أستغل فرصة وجودي في بريطانيا وأبدأ أتعلّم

ف لـمّا بدأت مرحلة الدكتوراه وعدّيت السنة الأولى الحمدلله في ٢٠١٥، ولقيت نفسي أروق وعندي وقت فاضي، بدأت أدوّر عن الإجراءات اللي لازم أسوّيها، وكيف أحقق الـمُتطلّبات

ف كان أول شئ الـمفروض إنّي أسوّيه إنّي أطلّع الرخصة الـمُؤقتة اللي تأهلني انّي اخد الدروس العمليّة

Provisional license

وحتى أقدّم عليها في طريقتين

الطريقة الأولى: نعبّي الفورم من البوست أوفيس، وندفع الرسوم في وقتها ونرفق صورة شخصية لنا، ومع الجواز

الطريقة التانية: نعبّي الفورم اون لاين من موقعهم الرسمي، حندفع الرسوم في وقتها، بس نستنى بعد كدا من ٣ الى ٥ أيام، وحيرسلو لنا عالبيت ورقة تانية نعبّيها ويطلبو مننا نرسلهم معاها الجواز والفيزا، والافضل نرسلهم معاه كمان ظرف مسبق الدفع عشان لما يرجعولنا الجواز نقدر نتتبعه ويوصلنا أسرع ، ف في خلال ٣ الى ٥ ايام كمان حتوصلنا الرخصة الـمؤقتة

بعد كدا بدأت أدوّر على مدارس تعلّمني السّواقة، وحاولت إني أدوّر على أرخص المدارس، و هما عادة يقولو الـمتدرب يحتاجلو ٤٠ ساعة على الأقل حتى يصير متمكّن من السّواقة ويقدر يعدّي الاختبار العملي

ف الأشياء اللي لازم نسوّيها عشان نحصل عالرّخصة: ناخد دروس عملية، ونختبر الاختبار النظري، وبعد ماننجح فيه حيحقّلنا نحجز للاختبار العملي

الـمدرسة الأولى

بدأت الدروس في ابريل ٢٠١٥، كنت آخدها كل أسبوع ساعتين في اليوم، وبعد دوام الجامعة، في أول حصة اتعلّمت على أساسيّات السّيارة، والـمُصطلحات وخلاني أطبّق عملي في شارع في حارة ماتمر منه سيارات كتير

في الحصة التانية، صار يخليني امشي بالسيارة من شارع للشارع التاني اللي جمبه

في الحصة الثالثة، خلاني أوصّل نفسي البيت وخلاني أمشي في الشارع الرئيسي بين السيارات والباصات، كان إحساس يخوّف شويّا بس في نفس الوقت كنت مبسوطة حسّيت بإنجاز رهيب، وكسرت حاجز الخوف

بعد كدا قررت ما أكمّل معاه، ف مُجمل الساعات اللي اخدتها معاه كانت ٦ ساعات، وأكبر سبب ماخلاني أكمل معاه انو كان يعصّب عليّا بسرعة، ومو قاعد يتحمّلني اني لسا مبتدئة من الصفر، ف نفسياً ماكنت مُرتاحة معاه

الـمدرسة الثانية

كمّلت على طول عشان لا أنسى اللي اتعلّمته، و مع انها كانت أغلى من الأولى، بس قلت أجرب، ف في البداية كنت جداً مبسوطة، لأن اللي كانت تعلّمني فيميل المرة دي، فكان بالها أطول وكانت تعطيني نصايح وتشجّعني أقرا في الكتب وأستعد للاختبار النظري، فمن ضمن نصايحها انو ساعتين في الاسبوع ماتكفّيني ف اقترحت اخد ٤ ساعات في الاسبوع، وابدأ الدروس الصباح قبل الدوام عشان يكون بالي نشيط ومصحصح، وكانت تودّيني طرق أبعد وتدخّلني في الزحمة، بس بعد شهرين حسّيت انّي أضيّع وقت معاها، وما بتعلمني شئ جديد، ف برضو قررت أوقف وما أكمل معاها، و مُجمل الساعات اللي اخدتها معاها كانت ١٥ ساعة ونص، وفي خلال دي الشّهرين اختبرت اختبارين نظري و للأسف مانجحت فيهم

كنت أحسب عدد الساعات اللي اتعلمتها في المدرستين، ومع التكاليف

الـمدرسة الثالثة

طحت في مدرسة أسعارها أرخص من الاتنين اللي قبل، والانستركتور مع انه جديد عالمدينة ومو عارف الطرق كويس، الا اني حبّيت طريقة تعليمه، وكل مرة يعطيني شئ جديد، وكانت وجهة نظره غير عن اللي قبلهم انو ساعتين في اليوم الواحد طويلة و مملة ف اقترح انو اخد ساعة في اليوم بمعدل ساعتين في الأسبوع، واللي كان عاجبني فيه انو عنده ملف ليّا يسجل فيه ملاحظاته ويقيّمني ويقولي في ايش اتحسنت وايش اللي يبالي أركّز عليه الحصة الجايّة، قعدت تقريباً معاه ٧ شهور، بس ماكانت متصلة وقفت مرة عشان اجازة الصيف، ومرة عشان العيد، ومرة عشان مؤتمر، ومرة عشان اجازة الكريسميس، بس في خلال المدة دي نجحت في الاختبار النظري الحمدلله في المحاولة رقم ٣، على قولتهم الثالثة ثابتة

الصفحة الأولى لعدد الساعات اللي اخدتها مع الانستركتور الثالث

ف الاختبار النظري عبارة عن جزئين: الجزء الأول اختيار من متعدد ولازم نجيب ٤٣ من ٥٠

والجزء الثاني عبارة عن مقاطع فيديو واحنا لازم نتنبّه لـمواقع الأخطار ونستجيبلها في أسرع وقت

وعشان نذاكرلهم في آب رسمي نشتريه عالجوال، او كتاب رسمي مع سي دي وكلهم فيهم أسئلة الاختبار، ونقدر نسوي براكتيس كأننا في اختبار حقيقي

وكنت دايماً أتفرّج مقاطع يوتيوب ك مصدر تاني يعلّمني سواء للدروس العملية او للاختبار العملي

وبعد ماعدّيت الاختبار النظري، حجزت لاختبار عملي

والاختبار العملي مدته ٤٠ دقيقة، في البداية الـمُختبر حيسأل سؤالين عن اساسيات السيارة، وبعد كدا يبدأ التطبيق العملي، حيراقب فيها طريقة سواقتي وهل أنا أسوق بشكل آمن او لا، ويطلب مني أوقف السيارة في موقف بطريقة من اختياره، ويحقلي في الاختبار عشان أعديه أغلط ١٤ غلط صغير، بينما لو غلطت غلط واحد كبير ويسبب خطر ليا ولغيري حسب المعايير اللي هما حاطّينها ف هنا محا أنجح في الاختبار

   

اختبرت ٣ اختبارات عملية مع الانستركتور في ٣ مراكز اختبار مختلفة، بس للأسف كلها مانجحت فيها، وبعد كل اختبار يعطوني ورقة التقييم اللي فيها الأخطاء تبعي، فكان هوا بعد كدا يركّزلي عالأشياء اللي غلطت فيها عشان ما أكررها

الاختبارات العملية اللي اختبرتها وتكملة الدروس

بعد كدا، الانستركتور صارتله ظروف واضطر انه ينقل من ليستر، ف للأسف ماقدرت اكمّل معاه، فكان مُجمل الساعات اللي اخدتها معاه ٢٣ ساعة

الـمدرسة الرابعة

اقترح عليّا أحد الأصدقاء انستركتور في مدينة لفبرا جمب ليستر بالترين ١٠ دقايق، وكان نظامه مرة حلو انّو يعلّمني عالطّرق اللي يتّبعوها الـمُختبرين، ولان المدينة صغيرة فالمسارات حقت الاختبار مرة محدودة، وكان يعطيني ارشادات كيف أعدّي الاختبار وأستعد له، ف اخدت معاه حصتين في اسبوعين بمعدّل ساعتين في الأسبوع، وبعدها اختبرت على طول و الحمدلله و أخيييراً نجحت في الاختبار العملي في المرة الرابعة في شهر مارس ٢٠١٦

أول شئ سوّيتو لـمّا نجحت في الاختبار، أرسلت للانستركتور اللي قعدت معاه ٧ شهور، لأنو كان جدا متأمل انّو انجح قبل ما ينقل، بس للأسف ما صارت، وكان دايماً بعد كل اختبار ما أنجح فيه يشجّعني ويقولي انا عارف انّو دا الشئ ممكن يكون مُحبط ليكي بس أبداً لاتوقفي ف مادامك بدأتي كمّلي خسارة التعب اللي تعبتيه يروح عالفاضي

ف لـمّا ننجح في الاختبار العملي، ياخدو مننا الرخصة الـمؤقتة، ويعطونا شهادة تثبت اننا نجحنا في الاختبار، وبيها نقدر نستأجر سيارة على طول لو نبا، وبعد كدا حتوصلنا عالبيت الرخصة الأساسيّة

وبكدا يصير مجموع الساعات كاملة اللي أخدتها في التدريب ٤٨ ساعة ونص خلال سنة تقريباً

زملائي في المكتب كانو مجهّزينلي الهديّة من اول مرة قلتلهم انّو عندي اختبار، بس وقتها مانجحت فخبّوها الين مانجحت اعطوني هيّا على طول وقالو الحين جا وقتها تستلميها 🙊

أصدقائي كمان شاركوني فرحة الـنّجاح

فالحمدلله كانت تجربة مرة حلوة، ومفيدة، وممتعة، وجداً مبسوطة انّي سوّيتها وحقّقتها

و امكن في التدوينات الجايّة أتكلّم عن تجاربي الأولى ومغامراتي في استئجار السيارة