رحلة اليوم الواحد في مدينة باث | بريطانيا

من ضمن سلسلة رحلاتي الأسبوعية، أزور كل مدينة بريطانية قريبة مني في يوم كامل من الصّباح الين الليل، و المدينة اللي حأتكلّم عنها اليوم مدينة باث، محا أتكلّم عنها من ناحية تاريخيّة، و لا عن قصة المدينة و سبب تسميتها، لأنو في تدوينة كاملة عنها حتلاقوها هنا

Bath Spa باث سبا

أنا حأتكلم عن رحلتي من ناحية سياحيّة، و حأغطّي الأماكن او أحط صور الأماكن اللي مهي موجودة في التدوينة

مدة الرحلة

من ليستر الى باث بالترين تقريباً 3 ساعات و 20 دقيقة، مع تبديل محطتين، أول شيء في برمنغهام نيو ستريت، و بعد كدا في بريستول

السنتر

خطّتي كانت أتمشّى في المدينة الصباح، و أتعرّف عالسنتر تبعها، سنترها جميل حبّيتو غير عن مدن بريطانيا، و نظيف و مرتّب، و محافظين عالتراث القديم تبعهم، والنّاس هنا لطيفة جداً

Pulteney Bridge

الجسر اللي يمرّ من تحته نهر ايفون، في وسط سنتر باث

الكاتيدرائية

Bath Abbey

الحمّامات الرّومانية

من عادتي لـمّا أزور أي مدينة، أحب أروح أستكشف الأماكن اللي هيّا مشهورة بيها، و مهي مُكرّرة في أي مدينة تانية، ف عشان كدا الحمّامات الرّومانيّة لها من زيارتي نصيب، وتاريخ الحمّامات و قصّتها بالتفصيل حتلاقوها في التدوينة
Bath Spa باث سبا

و دا مُجسّم كامل للحمامات الرّومانيّة

تيكيت الدّخول لها، ممكن تشتروها أون لاين و ممكن تشتروها في نفس اليوم، و الأسعار تختلف حسب المواسم، و الطلاب لهم ديسكاونت
Romanbaths

بيت سالي

كمان القصة حتلاقوها في التدوينة
Bath Spa باث سبا

و في الدور الأرضي من البيت، حتلاقو زي المتحف صغير مرة، يورّوكم كيف كان مطبخ سالي

الرويال كرسنت أو القوس الملكي

صورة بانورامية للمكان، برضو من الأماكن اللي تستاهل الواحد يروح يشوفها و يشوف التصميم البنائي تبعها، و قدامه حديقة ممكن الواحد يجلس فيها و يتمشّى فيها

Stonehenge

من أبرز المعالم التاريخية في بريطانيا، تمّ بناءها من قبل 3500 سنة، و استغرق بناءها 1500 سنة، و اتكوّنت من 170 حجارة

تبعد عن باث ساعة كاملة بالسيارة، رحلتي لها كانت مع قروب سياحي بالباص

حجزت التيكيت اون لاين من موقعهم
Scarpertours
الطلاب لهم ديسكاونت، و التيكيت شاملة الباص و دخول المعلم نفسه و كمان مع جهاز الإرشاد الصوتي، مدة الرحلة 4 ساعات، ساعتين في الطريق رايح جاي، و ساعتين نجلس نتفرج فيها

هنا المدخل، و لـمّا نوصل هناك كمان في باص تاني يودّينا عالمكان نفسو، و التيكيت حقتنا شاملة الباص التاني كمان

الحجارات مكوّنة شكل حلقة، و مثبتينها و هيّا واقفة في منطقة تعتبر أكثر مناطق الأرض كثافة عشان تقدر تستحمل ثقلها و هيا واقفة

  

و هنا الأكواخ اللي كانو عايشين فيها الناس اللي بدؤو ب بناء الحجارات

و دي الصّخرة عارضينها عشان نعرف قد ايش وزن الحجارات اللي استعملوها عشان يبنو الـمعلم، و حاطين انو كم شخص يحتاج عشان يشيل دي الصخرة

دي كانت أبرز معالم مدينة باث، طبعا فيها محلات شوبينق بس زي ما قلت في بداية التدوينة أنا في رحلاتي ما أحب أضيّع وقتي في المحلات، أحب أستغل الوقت و أتفرّج في الأماكن الخارجية المفتوحة، و كمان فيها مطاعم و كافيهات و نفس الشئ ما أحب أضيّع وقتي في المطاعم و الكافيهات، و ايوا صح باث فيها الباص الأحمر السّياحي اللي يورّينا أبرز معالم باث السياحيّة بس برضو ما حبّيت آخده عشان أغلب الأماكن أقدر أوصل لها مشي