التخطيط لكل رحلة

قبل ما أبدأ أحكّي عن جولاتي في كل دولة، دي الخطوات اللي أسوّيها لمّا أجي أرتب و أخطط لأي سفرة

رحلات الطّيران -

موقع و تطبيق سكاي سكانر، جربت أكتر من موقع بس دا يفوز على أغلب المواقع -من وجهة نظري عالأقل-، سواء يعطيني رحلات دايركت او ترانزيت، و كمان عشان اتأكد انو بيعطيني أسعار رخيصة و كويسة أدخل على نفس موقع شركة الطيران اللي يقترحلي هيا و أقارن الأسعار ف أغلب الأحيان يكون هوا فعلاً رخيص او في بعض الأحيان موقع الشركة نفسها يكون أرخص

الفنادق -

موقع و تطبيق بوكينق، برضو جرّبت أكتر من موقع بس دا أكتر واحد ناسبني سواء من ناحية وصفه لمكان الفندق و الأماكن اللي حواليه، و من ناحية التقييم و آراء الناس، و من ناحية الإلغاء المجاني، و اذا احتجت وسيلة مواصلات من المطار الى الفندق ممكن يوفرها بسعر مناسب جداً، كمان بعد ما تطلعلي خيارات الفنادق الموجودة أروح أدخل لموقع الفندق نفسه و أقارن الأسعار، غالبا يكونو نفس السعر بس الفرق انو بوكينق يعطيني خيار الالغاء المجاني، بس أحيانا موقع الفندق نفسه يكون أرخص خصوصاً اذا سجّلنا عضويّة يعطي خصم 10 بالميّة

الأماكن -

طبعاً أول خطوة أسوّيها عشان اعرف اش اماكن التمشية في كل مدينة، اكتب في قوقل 

Places to visit in ... 

كدا آخد لمحة سريعة عن أهم و أشهر الأماكن السياحية في البلد اللي بأزوره

 كمان موقع و تطبيق

City sightseeing

يساعدني كتير في اني احدد الاماكن و فين موقعها عالخريطة و مين أقرب لمين، ف برضو يعطيني أفكار

و بعض الدول محا يكون فيها الباص الأحمر، ف الموقع و التطبيق البديل يكون

Big bus

فبعد ما أشوفهم يا أقرر اني اعتمد في رحلتي عليهم خصوصا اذا كانت المدينة كبيرة ف أقدر أستفيد من خيار تيكيت صالحة للاستخدام يومين، أو إني ما استعملهم و اروح استكشف الاماكن مشي اذا كانو قريبين من بعض، و كمان أحياناً تكون في أماكن ما تكون من اهتماماتي ف ما احتاج اروحها

مطويات زاد المسافر، حلاوتها إنها مختصرة و في نفس الوقت تعطي الزبدة، تفيدني كتير في إني أحدد أحسن الأماكن للسكن و برضو فيها أبرز الأماكن السياحية، و كمان لو في مدن قريبة أقدر اروحها تكون حوالين المدينة اللي انا مخططتلها

و تويتر طبعا ما نستغنى عنه، هاشتاق أي مدينة و أي دولة حيكون مليان اقتراحات و أماكن 

و انستجرام كمان من الأساسيات اللي لازم أشيّك عليه و الصور حيكون لها دور كبير و تحمسّني أروح أزور و أستكشف و أجرب مطاعم او كافيهات

و فورسكوير أكييد من أهم الأبلكيشنز اللي تنصحنا بمكان معين، و تورّينا آراء الناس، و اش اكتر طلب مشهور في كل   مطعم، و كمان نقدر نعرف كيف نوصل للمكان و نعرف متى يفتح و متى يقفل

جدول للرحلة -

بعد ما أحدد الأماكن اللي بأروحها أجلس أرتب كل يوم فين أروح و أحاول أختار الأماكن اللي تكون قريبة من بعض تكون في نفس اليوم عشان أكسب وقت و أستفيد من اليوم بأكمله، و سبحان الله ما ارتاح و أنبسط في التخطيط إلا إذا مسكت الورقة و القلم و قعدت أشخبط، و حلاوة الورقة و القلم بعد ما يخلص اليوم أجلس أشخمط عالخطة حقت دا اليوم و أحس بالإنجاز، و أتحمّس لليوم اللي بعدو

دا مثال لجدول من الجداول اللي خطّطّتلها